AI sektorunun milyarderləri səhmlərini satır – “Nvidia” direktoru siyahıya başçılıq edir

Süni intellekt sənayesi ilə əlaqəli milyarderlər 2026-cı ilin üçüncü rübündə ABŞ şirkətlərinin ən iri insayder səhm satıcıları arasında yer alıblar.

“Bloomberg” xəbər verir ki, siyahıya “Nvidia”nın direktoru və erkən investorlarından biri Mark Stivens başçılıq edir. O, rüb ərzində şirkətin 946,6 milyon dollar dəyərində səhmini satıb.

İri satışlar siyahısında “Arista Networks”un rəhbəri Ceyşri Ullal 446 milyon dollar, “Illumina” ilə əlaqəli investor Kit Meyster 436,2 milyon dollar, “SharkNinja”dan Sünin Vanq 401,2 milyon dollar, AI bulud infrastrukturu şirkəti “CoreWeave”in həmtəsisçisi Maykl İntrator isə 347,2 milyon dollar dəyərində səhm satıb.

“Amazon”un təsisçisi Ceff Bezosun satışları 346,5 milyon dollar, “United Therapeutics”in rəhbəri Martin Rotblattın 314,1 milyon dollar, “BeOne Medicines”dən Con Oylerin 293,5 milyon dollar, kosmik texnologiyalar şirkəti “Rocket Lab”ın rəhbəri Piter Bekin 286,4 milyon dollar, bulud proqram təminatı şirkəti “Snowflake”in keçmiş rəhbəri Frank Slootmanın isə 282,7 milyon dollar təşkil edib.

“Bloomberg” qeyd edir ki, bu satışlar texnologiya və AI səhmlərində qiymətləndirmələrin yüksək olduğu, eyni zamanda bazarda mümkün köpük riski ilə bağlı xəbərdarlıqların artdığı dövrə təsadüf edir.

Bununla belə, insayder satışları avtomatik olaraq həmin rəhbərlərin şirkətlərin perspektivlərinə mənfi baxması demək deyil. Belə satışlar əvvəlcədən hazırlanmış planlar, diversifikasiya, vergi və şəxsi likvidlik ehtiyacları ilə də bağlı ola bilər.