Tim Kuk Apple səhmlərini təxminən $64 milyona satıb

Apple-ın Direktorlar Şurasının sədri Tim Kuk ABŞ Qiymətli Kağızlar və Birjalar Komissiyasına (SEC) təqdim edilən sənədlərə əsasən, təxminən 64 milyon dollar dəyərində Apple səhmi satıb.

Şirkətin məlumatına görə, Kuk oktyabrın 2-də ümumilikdə 191 753 Apple səhmini hər səhm üçün 331,44–333,94 dollar qiymət intervalında satıb. Əməliyyatların ümumi məbləği təxminən 63,85 milyon dollar təşkil edib.

Satış Kuk-a məxsus 374 541 məhdudlaşdırılmış səhmin Apple səhmlərinə çevrilməsindən bir gün sonra həyata keçirilib. Bu zaman Apple səhmlərin verilməsi ilə bağlı vergi öhdəliklərini qarşılamaq üçün təxminən 65,75 milyon dollar dəyərində 199 038 səhmi saxlayıb.

Kukun səhmləri satması əvvəlcədən təsdiqlənmiş ticarət planına uyğun həyata keçirilib. Buna görə də əməliyyat onun şirkətdəki payını qəfil azaltması kimi qiymətləndirilmir.

Bu ilin əvvəlində Kuk təxminən 15 il Apple-a rəhbərlik etdikdən sonra baş direktor vəzifəsindən ayrılıb və Direktorlar Şurasının icraçı sədri olub. Baş direktor vəzifəsini isə Con Ternus tutub.

Məlumata görə, Ternus da eyni plan çərçivəsində səhmlərinin bir hissəsini satıb. O, ümumilikdə 8,5 milyon dollar dəyərində 99 878 səhm satıb.